మధిరలో ఏసిబి ట్రాప్

• పట్టుబడ్డ అసిస్టెంట్ లేబర్ ఆఫీసర్ చందర్రావు
• ఎక్స్ గ్రేషియా మంజూరుకు డబ్బులు డిమాండ్

( తాళ్లూరి అప్పారావు, మధిర )

మధిర పట్టణంలో అవినీతి నిరోధక శాఖ( ఏసీబీ ) అధికారులు అసిస్టెంట్ లేబర్ ఆఫీసర్ చందర్రావు లంచం తీసుకుంటుండగా పట్టుకోవడం సంచలనం సృష్టించింది. ఒక భవన నిర్మాణ కార్మికుడు మృతి చెందగా అతనికి ప్రభుత్వం నుండి రావలసిన ఎక్స్ గ్రేషియా డబ్బులు మంజూరు చేసేందుకు రూ 30 వేలు లంచం డిమాండ్ చేయగా అందులో నుండి రూ 15 వేలు తీసుకుంటూ సోమవారం ఏసీబీ అధికారులకు పట్టుబడ్డాడు. మరణించిన కార్మికుడికి సంబంధించిన మరణ ధ్రువ పత్రం, కుటుంబ సభ్యుల ధ్రువీకరణ పత్రం, బ్యాంకు ఎకౌంటు జిరాక్స్ కాపీలను లేబర్ ఆఫీస్ ద్వారా ప్రభుత్వానికి పంపిస్తే ప్రభుత్వం మరణించిన కార్మికుడి కుటుంబానికి రూ లక్ష 30 వేలు ఎక్స్ గ్రేషియా గా అందజేస్తుంది. వీటిని ప్రభుత్వానికి పంపించాలంటే రూ 30 వేలు డిమాండ్ చేయడంతో బాధితులు ఏసీబీ నీ ఆశ్రయించారు. దీంతో ఏసీబీ అధికారులు కెమికల్ పౌడర్ పూసిన నోట్లను బాధితుడికి ఇచ్చి వాటిని లేబర్ ఆఫీసర్ చందర్రావు కు ఇస్తుండగా దాడి చేసి పట్టుకున్నారు. ఏసీబీ అధికారుల దాడిని పసిగట్టిన చందర్రావు పరారయ్యేందుకు ప్రయత్నించగా ఏసీబీ సిబ్బంది వెంటాడి పట్టుకుని అతని నుండి 15వేల నగదు డబ్బులు పెట్టిన బ్యాగును స్వాధీనం చేసుకున్నారు. మధిర పట్టణంలో ఏసీబీ అధికారుల దాడి సంచలనం సృష్టించింది. ఈ సందర్భంగా ఏసీబీ డి.ఎస్.పి వై. రమేష్ మాట్లాడుతూ మరణించిన భవన నిర్మాణ కార్మికుడి రావలసిన ఎక్స్ గ్రేషియా డబ్బులు మంజూరి కొరకు మధిర అసిస్టెంట్ లేబర్ ఆఫీసర్ లంచం డిమాండ్ చేయగా ఆ విషయాన్ని బాధితుడు తమ దృష్టికి తీసుకురావడంతో దాడి చేసి పట్టుకున్నట్లు తెలిపారు . ప్రభుత్వ అధికారులు లంచం అడిగితే ఏసీబీ టోల్ ఫ్రీ నెంబర్ 1064 సమాచారం ఇవ్వాలని, సమాచారం ఇచ్చిన వారి వివరాలు గోప్యంగా ఉంచుతామన్నారు. అలాగే ఏసీబీకి సమాచారం ఇస్తే పనులు కావాని భయపడాల్సిన అవసరం లేదని, నిబంధనల మేరకు ఉంటే ఆ పనులు పూర్తి చేసేందుకు ఏసీబీ అండగా ఉంటుందని ఆయన ఈ సందర్భంగా తెలిపారు.