బిజెపి, బిఆర్ఎస్ వైఫల్యం వల్లే జూబ్లీహిల్స్ లో కాంగ్రెస్ గెలిచింది

• ఆరు గ్యారెంటీలు అమలు కోసం జాగృతి పోరాటం
• తనను విమర్శించే నాయకులను ఎవరూ రక్షించలేరు
• జాగృతి సంస్థ రాష్ట్ర అధ్యక్షురాలు కల్వకుంట్ల కవిత

( తాళ్లూరి అప్పారావు, మధిర )

రాష్ట్రంలోని కాంగ్రెస్ ప్రభుత్వంపై ప్రజల్లో తీవ్ర వ్యతిరేకత ఉన్న బిజెపి, బిఆర్ఎస్ పార్టీలు ప్రతిపక్ష పాత్ర పోషించడంలో వైఫల్యం చెందడం వల్లనే ఇటీవల జరిగిన జూబ్లీహిల్స్ ఉప ఎన్నికల్లో కాంగ్రెస్ పార్టీ గెలుపొందిందని జాగృతి రాష్ట్ర అధ్యక్షురాలు కల్వకుంట్ల కవిత విమర్శించారు. జాగృతి జనం బాట కార్యక్రమంలో భాగంగా సోమవారం ఖమ్మం జిల్లా మధిర నుండి  ఎర్రుపాలెం మండలం జమలాపురంలో శ్రీ వెంకటేశ్వర స్వామి ఆలయానికి చేరుకొని స్వామివారిని దర్శించుకుని ప్రత్యేక పూజలు చేశారు. అనంతరం కవిత మీడియాతో మాట్లాడుతూ కవిత వెన్నుపోటురాలు అని బిఆర్ఎస్ ఎమ్మెల్యేలు చేసిన ఆరోపణలపై స్పందిస్తూ తనపై ఆరోపణలు చేస్తున్న వ్యక్తుల్ని దీర్ఘకాలం ఎవరూ రక్షించలేరన్నారు. ప్రజా జీవితంలో ఎవరిపై ఆరోపణలు వచ్చిన దానికి సమాధానం చెప్పి తీరాల్సిందేనన్నారు. కాంగ్రెస్ ఇచ్చిన 6 గ్యారంటీల అమలుపై, ప్రజా సమస్యల పరిష్కారం కోసం జాగృతి సంస్థ నిరంతర పోరాటం చేస్తుందన్నారు.  ప్రజల్లో ఉంటూ ప్రజా సమస్యలపై పోరాటం చేస్తూ జాగృతి సంస్థను బలోపేతం చేయనున్నట్లు ఆమె ఈ సందర్భంగా తెలిపారు. అనంతరం మధిర మున్సిపాలిటీ పరిధిలో దీర్ఘకాలికంగా పెండింగ్లో ఉన్న లెదర్ పార్కు స్థలాన్ని ఆమె పరిశీలించారు.

జమలాపురం ఆలయంలో కవిత ప్రత్యేక పూజలు

ముందుగా జాగృతి సంస్థ రాష్ట్ర అధ్యక్షురాలు కల్వకుంట్ల కవిత చిన్న తిరుపతిగా పేరుగాంచిన జమలాపురం స్వయంభు శ్రీ వెంకటేశ్వర స్వామి ఆలయంలో ప్రత్యేక పూజలను నిర్వహించారు. జాగృతి జనం బాట కార్యక్రమంలో భాగంగా ఎర్రుపాలెం మండలంలోని జమలాపురం ఆలయాన్ని ఆమె సోమవారం సందర్శించారు. ఈ సందర్భంగా శ్రీవారి ఆలయంలో ప్రత్యేక పూజలు నిర్వహించారు. ఆలయ సాంప్రదాయం ప్రకారం అర్చకులు,ఆలయ అధికారులు సాదర స్వాగతం పలికారు. ఈ సందర్భంగా కవిత శ్రీవారికి ప్రత్యేక పూజలు చేశారు. షుమారు 2 గంటల పాటు పైగా ఆమె ఆలయంలో గడిపారు. ఆలయ చరిత్ర,విశిష్టతను ఆడిగి తెలుసుకున్నారు.అనంతరం అర్చకులు ఆశీర్వచనంతో పాటు శ్రీవారి చిత్రపటాన్ని, శేష వస్త్రాలను అందజేశారు. అనంతరం జాగృతి నాయకుడు మాజీ తెలంగాణ జాగృతి మండల అధ్యక్షుడు కాపర్తి సతీష్ గృహానికి వెళ్లారు .

ఏకో టూరిజం భూ నిర్వాసితులను పరామర్శ

జమలాపురంలో నిర్మాణం జరుగుతున్న అర్బన్ పార్క్ ఏకో టూరిజం ప్రాజెక్ట్ భూ నిర్వాసితులను ఆమె పరామర్శించారు. ఏకో టూరిజం ప్రాజెక్ట్ ద్వారా తమ భూములను కోల్పోతున్నామని, ప్రత్యామ్నాయం చూపకుండా అటవీశాఖ అధికారులు భూములను లాక్కున్నారని రైతులు ఆమె ఎదుట ఆవేదన వ్యక్తం చేశారు. ప్రభుత్వం చొరవ తీసుకొనేల తమ వైపు పోరాడాలని కవితను నిర్వాసితులు అభ్యర్దించారు. ఉన్నతాధికారులతో మాట్లాడతానని భూములు కోల్పోయిన రైతలకు జాగృతి అండగా ఉంటుందని హామీ ఇచ్చారు. ప్రత్యామ్నాయమో,పరిహారామో వచ్చే వరకు జాగృతి 13 మంది రైతుల  తరుపున పోరాటం చేస్తుందన్నారు. ప్రస్తుతం కోర్ట్ పరిధిలో ఉన్నందున తీర్పు వచ్చే వరకు సంయమనం పాటించాలని ఆమె కోరారు. ఈ కార్యక్రమంలో తెలంగాణ జాగృతి రాష్ట్ర ప్రధాన కార్యదర్శి నవీన్ ఆచారి, జిల్లా అధ్యక్షుడు గుంటి సుందర్,కొత్తగూడెం జిల్లా అధ్యక్షురాలు గట్టు కరుణ, జాగృతి రాష్ట్ర నాయకులు పవన్ ప్రతాప్ నాయక్, నాయకులు బూసిపోగు సృజన్ కుమార్, గద్దల సత్యనారాయణ, ఉయ్యూరు సాయిరాం,పోతురాజు గౌతమ్ తదితరులు పాల్గొన్నారు.