గిరిజన సాంస్కృతీ సాంప్రదాయాలను పరిరక్షించాలి ... ఎస్. శ్యామ్ కుమార్
గిరిజన సాంస్కృతీ సాంప్రదాయాలను పరిరక్షించాల్సిన అవసరం ఎంతైనా వుందని భద్రాద్రి కొత్తగూడెం జిల్లాలోని కిన్నెరసాని గురుకుల పాఠశాల ప్రిన్సిపాల్ ఎస్. శ్యామ్ కుమార్ అన్నారు. మంగళవారం గిరిజనుల సాంప్రదాయాల్లో భాగమైన “ సీత్లా పండుగ” ను పాఠశాలలో ఘనంగా నిర్వహించారు. ఈ సందర్భంగా శ్యామ్ కుమార్ మాట్లాడుతూ గిరిజనుల సాంస్కృతిక వారసత్వాన్ని తర తరాలకు అందజేయాలని కోరారు. ఆ ఉద్దేశంతోనే కిన్నెరసాని గిరిజన గురుకుల పాఠశాలలో బంజారాలకు అత్యంత ప్రాధాన్యమైన “సీత్లా పండుగ” ను ఘనంగా నిర్వహించామన్నారు. ఈ పండుగను అర్ధం చేసుకొని భావి తరాలకు తెలియ జేయాల్సిన బాధ్యత అందరిపైనా వుందన్నారు. అనంతరం బంజారాల ప్రత్యేకమైన ఆచారాలు, సంప్రదాయాలు, సీత్లా పండుగ విశిష్టతను ఉపాధ్యాయులు విద్యార్థులకు వివరించారు. గిరిజన సంప్రదాయ నృత్యాలు, గుర్తింపు చిహ్నాలను ప్రదర్శించడంతో పాటు ప్రత్యేక సాంస్కృతిక కార్యక్రమాలు కూడా నిర్వహించారు.
కొత్త స్టేజ్ నిర్మాణానికి భూమి పూజ
అంతకు ముందు పాఠశాలలో కిన్నెరసాని గురుకుల స్వర్ణోత్సవాల సందర్భంగా కొత్త స్టేజ్ నిర్మాణానికి భూమి పూజ చేశారు. ఈ పాఠశాలకు చెందిన పూర్వ విద్యార్థి తేజావత్ జానకి రామ్ పాఠశాలతో ఉన్న అనుబంధం, ప్రేమతో దీని నిర్మాణానికి ఆర్థిక సహాయం అందించారు. అంజనపురం గ్రామానికి ఆయన ప్రస్తుతం ఆస్ట్రేలియాలో ఉద్యోగం చేస్తున్నారు. డిసెంబర్ 28న జరిగే స్వర్ణోత్సవాల నాటికి ఈ వేదికను సిద్ధం చేస్తారు. స్వర్ణోత్సవాల విజయవంతానికి ఇది తొలి అడుగని ప్రిన్సిపాల్ ఎస్. శ్యామ్ కుమార్ఈ సందర్భంగా పేర్కొన్నారు. తమ పాఠశాల అభివృద్ధిక, విద్యార్థుల విద్యాభివృద్ధికి హృదయ పూర్వకంగా సహకరించిన జానకిరామ్ కు ప్రత్యేక కృతజ్ఞతలు తెలిపారు. ఈ కార్యక్రమాల్లో వైస్ ప్రిన్సిపల్ శ్రీమతి పి.తిరుపతి , ఉపాధ్యాయులు మరియు విద్యార్థులు పాల్గొన్నారు.
Comments
Post a Comment