'బీసీ డిక్లరేషన్ విజయోత్సవ సభ' ... కామారెడ్డిలోనే ఎందుకు?

తెలంగాణ ( Telangana ) లో త్వరలో జరగబోయే స్థానిక సంస్థల ఎన్నికలను దృష్టిలో పెట్టుకొని, కాంగ్రెస్ ( Congress ) పార్టీ బీసీ ఓటు బ్యాంకును తమ వైపు తిప్పుకోవడానికి పెద్ద ప్రణాళికను సిద్ధం చేసింది. దీనిలో భాగంగా, బీసీలకు 42 శాతం రిజర్వేషన్లు కల్పించాలన్న ప్రభుత్వ నిర్ణయాన్ని ప్రజల్లోకి బలంగా తీసుకెళ్లడానికి ఈ నెల 15న కామారెడ్డిలో 'బీసీ డిక్లరేషన్ విజయోత్సవ సభ' ను నిర్వహించనుంది. ఈ సభ నుంచే స్థానిక ఎన్నికల ప్రచారానికి శ్రీకారం చుట్టాలని కాంగ్రెస్ భావిస్తోంది.

కారణం ఇదే

గత అసెంబ్లీ ఎన్నికల సమయంలో కామారెడ్డి నుంచి అప్పటి సీఎం కేసీఆర్‌ ( KCR )పై రేవంత్ రెడ్డి ( Revanth Reddy ) పోటీ చేశారు. ఆ సమయంలో కామారెడ్డిలో జరిగిన కాంగ్రెస్ సభలోనే కర్ణాటక ముఖ్యమంత్రి సిద్ధరామయ్య బీసీ డిక్లరేషన్ను ప్రకటించారు. అధికారంలోకి వస్తే కుల గణన చేసి, బీసీలకు రిజర్వేషన్లు పెంచుతామని హామీ ఇచ్చారు. ఇప్పుడు ఆ హామీని నిలబెట్టుకుంటూ, రాష్ట్రంలో కుల గణన చేపట్టి బీసీ రిజర్వేషన్లను ( BC Reservation ) 42 శాతానికి పెంచుతూ ప్రభుత్వం ఆర్డినెన్స్‌ను గవర్నర్ ఆమోదానికి పంపింది. ఏ వేదికపై అయితే హామీ ఇచ్చారో, అదే వేదికపై నుంచి ఈ విజయోత్సవ సభ నిర్వహించడం ద్వారా బీసీ వర్గాలకు ఒక బలమైన సందేశాన్ని పంపవచ్చని కాంగ్రెస్ భావిస్తోంది.

సభకు హాజరుకానున్న అగ్ర నాయకులు

ఈ సభకు కాంగ్రెస్ అగ్ర నేత రాహుల్ గాంధీ ( Rahul Gandhi ), పార్టీ జాతీయ అధ్యక్షుడు మల్లికార్జున ఖర్గే, ఏఐసీసీ ప్రధాన కార్యదర్శి కేసీ వేణు గోపాల్, కర్ణాటక ముఖ్యమంత్రి సిద్ధ రామయ్యలను ముఖ్య అతిథులుగా ఆహ్వానిస్తున్నారు. లక్ష మందికి పైగా జన సమీకరణ చేసి, ఈ సభను విజయవంతం చేయాలని రాష్ట్ర నాయకత్వం లక్ష్యంగా పెట్టుకుంది. ఈ సభ ఏర్పాట్లపై ఇప్పటికే ప్రభుత్వ సలహాదారు షబ్బీర్ అలీ నివాసంలో ముఖ్య నాయకులు సమావేశమయ్యారు. ఈ సమావేశంలో పీసీసీ అధ్యక్షుడు మహేశ్ కుమార్ గౌడ్, మంత్రులు పొంగులేటి శ్రీనివాసరెడ్డి, సీతక్క పాల్గొని జనసమీకరణ, సభా ఏర్పాట్లపై చర్చించారు.