కవిత దారెటు ?

బీఆర్ఎస్ నుండి సస్పెన్షన్ కు గురైన ఎమ్మెల్సీ కల్వకుంట్ల కవిత రాజకీయ భవిష్యత్తుపై తెలంగాణలో విస్తృతంగా చర్చ జరుగుతోంది. కవిత తదుపరి అడుగులు ఎటు వైపు వేస్తారన్నది ఆసక్తి కరంగా మారింది. ఆమె మరో పార్టీలో చేరుతారా? లేదా సొంతంగా కొత్త పార్టీ పెడతారా ? అన్నదే ఇప్పుడు తెలంగాణలో హాట్ టాపిక్ అయ్యింది.

బీజేపీలో చేరే అవకాశమెంత ?

కవిత బీజేపీలో చేరే అవకాశాలు తక్కువగా ఉన్నాయనే విశ్లేషకులు భావిస్తున్నారు. ఎందుకంటే, గతంలో ఆమె బీఆర్ఎస్ పార్టీని బీజేపీలో విలీనం చేయబోతున్నారని ఆరోపిస్తూ పార్టీ నాయకత్వంపై తీవ్ర స్థాయిలో విమర్శలు చేశారు. ఈ నేపథ్యంలో, ఆమె బీజేపీలో చేరితే ప్రజల్లో విశ్వసనీయత కోల్పోవచ్చనే అభిప్రాయం ఉంది.

కాంగ్రెస్‌ ద్వారాలు తెరుస్తుందా ?

కాంగ్రెస్ పార్టీలో చేరడం కూడా సాధ్యం కాదనే వాదన బలంగా ఉంది. నిన్ననే, ముఖ్యమంత్రి రేవంత్ రెడ్డి, హరీష్ రావు, సంతోష్ రావుల వెనకుండి కేసీఆర్ పై కాళేశ్వరం ప్రాజెక్టు విషయంలో బురద జల్లుతున్నారని ఆమె చేసిన సంచలన వ్యాఖ్యలు కాంగ్రెస్ పార్టీతో ఆమెకున్న వైరుధ్యాన్ని స్పష్టం చేశాయి. ఈ వ్యాఖ్యల తర్వాత ఆమె కాంగ్రెస్‌లో చేరే అవకాశం లేదనేది రాజకీయ పరిశీలకుల అంచనా.

కొత్త పార్టీ ఏర్పాటు ?

ఈ రెండు ప్రధాన పార్టీలలో చేరికకు అవకాశాలు తక్కువగా ఉన్నందున, కవిత కొత్త పార్టీని పెట్టే అవకాశం ఎక్కువగా ఉందని విశ్లేషకులు భావిస్తున్నారు. ఈ మేరకు, తెలంగాణ బహుజన రాష్ట్ర సమితి లేదా తెలంగాణ రాష్ట్ర సమితి వంటి పేర్లతో ఆమె పార్టీని పెట్టే అవకాశం ఉందని ఊహాగానాలు వినిపిస్తున్నాయి.

కొత్త పార్టీ వల్ల కవితకు కలిగే ప్రయోజనాలు

స్వతంత్ర రాజకీయ శక్తి: సొంత పార్టీతో ఆమె తన తండ్రి మాజీ ముఖ్యమంత్రి కేసీఆర్ రాజకీయ వారసత్వాన్ని కొనసాగించ వచ్చు.

కొత్త ప్లాట్‌ఫారమ్: బీఆర్ఎస్ పార్టీపై అసంతృప్తిగా ఉన్న నాయకులు, కార్యకర్తలను ఆకర్షించే అవకాశం ఉంది.

అయితే, ఆమె ఒక వేళ కొత్త పార్టీ పెడితే ప్రజల నుంచి ఎలాంటి స్పందన వస్తుందో చూడాలి. ఏది ఏమైనా, కవిత రాజకీయ భవిష్యత్తుపై స్పష్టత రావాలంటే మరి కొన్ని రోజులు వేచి చూడాల్సిందే. ఆమె తీసుకోబోయే నిర్ణయం తెలంగాణ రాజకీయాలపై గణనీయమైన ప్రభావాన్ని చూపగలదా ? లేదా ? అన్నది అప్పుడే చెప్పలేం.